2022 ශ්‍රී ලංකා ක්‍රිකට් කාලසටහන නිකුත් වෙයි

Sports News

ශ්‍රී ලංකා ජාතික ක්‍රිකට් කණ්ඩායමේ 2022 වසරේ තරග කාලසටහන ශ්‍රී ලංකා ක්‍රිකට් ආයතනය මගින් නිවේදනය කර තිබේ. ඒ අනුව ලෝක කුසලාන තරගාවලියක් ඇතුළු තරගාවලි 09 කට මෙම වසර තුලදී ශ්‍රී ලංකා කණ්ඩායම සහභාගීවීමට නියමිතයි. මෙම වසරේ පළමු තරගාවලිය ලෙස සංචාරක සිම්බාබ්වේ කණ්ඩායමට එරෙහිව ශ්‍රී ලංකා කණ්ඩායම එක්දින තරග 03 කට සහභාගී වෙයි. ඉන් අනතුරුව ශ්‍රී ලංකා කණ්ඩායම ඕස්ට්‍රේලියාවේ සංචාරයක නිරත වන්නේ 20 – 20 තරග 05 කට ක්‍රීඩා කිරීම සඳහායි.

පෙබරවාරි සහ මාර්තු කාලසීමාවේදී ශ්‍රී ලංකා කණ්ඩායම ඉන්දීය සංචාරයකට එක්වන අතර ටෙස්ට් තරග 02 කට සහ 20 – 20 තරග 03 කට එහිදී සහභාගී විමට නියමිතයි. ටෙස්ට් තරග 02ක් සඳහා ශ්‍රී ලංකා පිල එලඹෙන මැයි මාසයේදී බංග්ලාදේශයේ සංචාරය කිරීමට නියමිතයි. ඕස්ට්‍රේලියානු කණ්ඩායමේ ශ්‍රී ලංකා සංචාරය ජූනි සහ ජූලි මාසවලදී යෙදී තිබේ. 20 – 20 තරග 03 ක්, එක්දින තරග 05 ක් සහ ටෙස්ට් තරග 02 ක් එම තරගාවලියට ඇතුළත්.

ජූලි සහ අගෝස්තු මාසවලදීයි එක්දින තරග 03 කට සහ ටෙස්ට් තරග 02 කට සහභාගී වීම සඳහා පකිස්තානු කණ්ඩායම මෙරට සංචාරය කිරීමට නියමිතව තිබේ. ආසියානු කුසලාන 20 යි 20 තරගාවලිය අගෝස්තු සහ සැප්තැම්බර් කාලසීමාවේදී මෙරටදී පැවැත්වෙයි. 20 – 20 ලෝක කුසලාන තරගාවලිය ඕස්ට්‍රේලියාවේදී පැවැත්වෙන්නේ ඔක්තෝම්බර් සහ නොවැම්බර් කාලසීමාවේදීයි. ශ්‍රී ලංකා කණ්ඩායම මෙම වසර අගදී ඉන්දීය සංචාරයක නිරත වීමට නියමිත බව ද ශ්‍රී ලංකා ක්‍රිකට් ආයතනය නිවේදනය කරයි.

Leave a Reply

Your email address will not be published. Required fields are marked *